انضمام الحق نے اپنے یوٹیوب چینل پر گفتگو کرتے ہوئے کہا کہ میں نے ایک طویل عرصے سے دیکھا ہے کہ بابراعظم نے سنچری نہیں بنائی، ان کا شمار ایسے کھلاڑیوں میں ہوتا ہے جنہیں ہم باقاعدگی سے رنز سکور کرنا اور سنچریاں بناتے دیکھنا پسند کرتے ہیں، بابر کو سنچریاں سکور کرنی چاہیئیں کیونکہ وہ ابھی اپنے کیریئر کے عروج پر ہیں، مجھے پسند نہیں کہ بابر 70 یا 80 پر آؤٹ ہو جائے، اسے بڑی اننگز کھیلنی ہوگی اور قومی ٹیم میں موجود دیگر بیٹسمنوں کے لیے رول ماڈل بننا ہوگا، یہ بہت اہم ہے۔
انضمام الحق کا مزید کہنا تھا کہ محمد رضوان اچھی کارکردگی کا مظاہرہ کر رہا ہے اور اسے بڑی اننگز بھی کھیلنی چاہیے، 20 اور 30 بی ٹیموں کے خلاف آپ کی مدد نہیں کرتے، میں اس کا کریڈٹ فواد عالم کو دیتا ہوں جو ایک بار سیٹل ہونے کے بعد بڑی اننگز کھیلتا ہے۔ وہ اپنے آغاز کو کم از کم سنچری میں تبدیل کرتا ہے جو کہ بہت اچھی بات ہے، دوسرے بلے بازوں کو بھی اس کی پیروی کرنی چاہیے۔
انضمام الحق نے ویسٹ انڈیز کے خلاف سیریز میں پاکستان کی بولنگ کی تعریف کی۔ ان کا کہنا تھا کہ ٹیل اینڈرز بھی اچھا کھیل رہے ہیں اور جب ہم سیریز دیکھتے ہیں تو پاکستانی بولرز نے بہت اچھی کارکردگی کا مظاہرہ کیا خاص طور پر جب وہ کم ٹوٹل کا دفاع کرنے کی کوشش کر رہے تھے ،ان میں جارحیت تھی اور بہت کم ٹوٹل کا دفاع کرنے کی کوشش کے باوجود انہوں نے ہمت نہیں ہاری، پہلا ٹیسٹ بھی پاکستان کے ہاتھ میں تھا لیکن پھر کچھ ڈراپ کیچز کی وجہ سے شکست کا سامنا کرنا پڑا، اگر آپ کم ٹوٹل کا دفاع کرتے ہوئے کیچ چھوڑتے ہیں توہدف کا دفاع کرنا اور بھی مشکل ہوجاتا ہے۔
دوسرے ٹیسٹ میں پاکستان کی فیلڈنگ کے معیار میں بہت بہتری آئی، خاص طور پر سلپ میں عمران بٹ نے کچھ زبردست کیچ لیے، میں نے ایک طویل عرصے کے بعد کسی کو اس پوزیشن پر بہت اچھی کیچنگ کرتے دیکھا ہے۔
